幸福堂 (已結業)

同姐姐喺銅鑼灣做節食過晚飯後,雖然已經好飽,但係女人嘛...要塞甜嘢入個肚度,係會有第二個胃嘅嚟到呢區,近期最hit嘅台式飲品店都好似俾我試得七七八八,就係爭呢間幸福堂未飲過,around九點左右行到過嚟,竟然冇人龍喎哈!香港人變心真係變得何其快呀......咁就順理成章造就咗我喇,排隊俾錢買單,我都只係排第五個,仲要係俾完錢就九秒九即刻沖好有得飲,內心都有啲興奮嘅感覺。喺我後面排隊嘅人俾完錢就自動走開咗,要啲職員叫停啲人話：「唔好走呀!沖好喇!有得拎喇!唔洗等呀!」場面搞笑大家都好似已經陷入咗一個病態...就係買台飲要慢慢等,機械人咁 速度快,服務好,自然就對呢杯嘢有唔小期望,我買呢杯係佢標明招牌焰遇幸福嘅黑糖珍珠鮮奶,見到杯入面深啡色佔咗好大比例,都感覺到幸福堂對黑糖方面落手一啲都唔吝嗇,仲有就係佔咗杯嘅三份之一位置嘅珍珠,一樣都係賣$30蚊,同隔離舖並肩而行。 認真攪拌試咗幾啖之後,好欣賞杯嘢嘅面頭有一層類似奶泡嘅口感,仲有就係Q彈嘅珍珠,鮮奶味濃郁加上被打至滑溜,但係缺點就係黑糖太旺盛喇,令到成杯飲品都過甜了