茶舍 (北帝街)

營業中

休息中

茶舍（北帝街）喺成條街嘅角落頭位置唔係幾起眼，佢都算係一間連鎖店。有啲人話佢係茶餐廳，我又唔覺得完全係茶餐廳。佢嘅食物款式真係好多。茶舍提供日式蛋包飯、意粉、意大利飯、港式焗飯、牛扒仲有蛋糕糖水，乜都有d。鮮蜆白酒煙肉蒜香天使麵賣相就一般，望落去呢好混亂呀，不過可能臨上碟嘅時候大兜亂炒一炒，所以都明白嘅。料就非常足夠，煙肉同蜆都多。味道方面呢，明顯有落白酒煮，有好獨特嘅白酒香。但係呢碟意粉嘅精髓我必須要提嘅，就係羅勒葉，又稱九層塔。呢塊羅勒葉嘅香味再加埋白酒蒜香，令到呢碟意粉係值得一試！咖哩牛腩焗飯就極之邪惡，咖哩夠辣夠香，而且有唔少芝士喺面，牛腩同牛筋嘅份量都唔算少。都係一個令人滿意嘅港式咖哩焗牛腩飯。