一哥點心 (已結業)

今晚早左少少諗住去睇下最近火熱嘅鹵家多唔多人，點知未夠7點已經排晒隊，最後都係決定放棄，走左去附近新開左一排嘅點心。一入到去阿姐嘅態度已經唔係特別好，而且佢嘅座位有d迫迫地，小店係咁上下，不過太大份就可能會坐得有d辛苦。一坐低阿姐就問飲咩茶，不過夜晚我唔習慣飲茶，咁就加多一壺水，但係結果壺水斟出嚟都係茶咁嘅色，我都懶得再同阿姐講！叫左4樣野，京蔥香煎菜肉包、薑蔥牛柏葉、原籠章魚肉餅飯同埋春風得意腸。首先上左京蔥香煎菜肉包，一上枱連埋個煎pan一齊上，好有氣勢咁。不過夾起左一隻之後，見到下面個底有好多油...味道係可以嘅，個包嘅外面都係脆嘅，不過真係油左少少。至於肉餅飯上枱嘅時候真係嚇一嚇，無諗過佢會咁大份。飯有荷葉香味，軟硬適中，肉餅嘅份量都算多，唔係整到好扁身嗰隻肉餅，而且亦都食到大大粒章魚，感覺都幾抵！至於薑蔥牛柏葉嘅牛柏葉係幾爽口嘅，不過就唔係好入味喇，如果入味d 應該會好食d ！春風得意腸未上枱都知道中間一定有d熱氣野，裡面有層脆卜卜嘅，面頭加左d蟹子。咁香口野對我嚟講好少係唔ok嘅，呢個都唔錯。四樣野加茶錢埋單唔洗$120都係幾抵食嘅，不過就唔好預佢有好好嘅服務喇！