臺坊 (加拿分道) (已結業)

約左朋友睇戲，收工之後拿拿林去食個快飯。呢間位於厚福街既台式小店價錢唔算貴，選擇又多，有唔同既小食，牛肉麵等等。因為唔想食太heavy，所以我無點主食，點知最後都係食到勁飽～芝士+煙肉台式蛋餅滿滿既芝士，超多芝士！！最鐘意拉到絲既芝士！！煙肉唔肥膩，加埋芝士無得輸，香得黎口感又好。但係蛋同餅皮略嫌煎得稍為輕手左，如果再煎耐少少應該會更香口。麻辣海蜇雞柳份量好足，蟹柳，海蜇，雞柳都放左超多，下面仲有青瓜絲墊底。雞柳彈牙唔乾身，有驚喜。調味方面都做得唔錯，辣得黎又唔會太嗆。而且連墊底既青瓜絲都新鮮脆身。雖然呢到地方細細，但係夠乾淨整潔，光線夠光猛同舒服，都坐得幾舒服。而且重點係好足料，只食蛋餅同小食已經好飽。