影片
更多
2019-03-06
38 瀏覽
呢排身邊多左朋友成為素食者，受佢地影響所以我都開始試下green monday計劃。咁今日行開銅鑼灣買野，見到呢間悠疏食評價都唔錯，所以就決定試下呢間素食餐廳。今次我地兩個人食，但店員好貼心咁安排左我地坐四人枱，而且斟完水又提我地小心熱，服務方面做得唔錯。由於我地食夜晚時段，最低消費係每人$200，Set dinner就~$250，銅鑼灣黎講其實都唔算好貴。我地今次叫左一個set dinner，個set有前菜、湯、手卷、主菜同甜品，再可以加錢要埋野飲，我地要左香芒牛油果苜蓿手卷、中湯、露荀黑松露意大利飯、同埋檸檬乳酪蛋糕，另外再散叫左椒鹽靈芝菇、腐皮卷同牛肝菌炆伊麵。呢到set dinner既所有野都可以散叫，但散叫價錢當然會貴過set少少，不過如果唔係咁大食又想試下都可以單點，呢樣野唔錯。同埋呢到既餐牌係有寫明食物係咪有蛋或者奶既成份，而且會寫埋係咪可以走蛋或者走奶，咁食純素既朋友都唔洗擔心。之後就每逐樣野講下啦：1.前菜前菜有三樣野，有木耳、水果沙律同埋薯仔蓉，用個豆形既碟裝住，賣相唔錯。木耳好爽口，而且調味好好食；水果沙律有火龍果、提子、菠蘿、車厘茄同啲沙律菜，無加沙律醬，單靠各
之後就每逐樣野講下啦：
1.前菜
前菜有三樣野，有木耳、水果沙律同埋薯仔蓉，用個豆形既碟裝住，賣相唔錯。木耳好爽口，而且調味好好食；水果沙律有火龍果、提子、菠蘿、車厘茄同啲沙律菜，無加沙律醬，單靠各種新鮮食材配搭己經好食，而且菠蘿都係新鮮既，好高質；薯仔蓉唔會好膩，有啲蔬果，夾埋幾清新，但我都唔係好食得出有咩係中間，哈哈。整體來講三款前菜都清新開胃，尤其係木耳，推薦！
2.猴頭菇竹笙黃耳湯
十分足料，啲料幾乎多過啲湯，味道濃郁。朋友對呢款湯讚不絕口，但我本身鍾意清啲既湯，同埋我平時飲湯係唔食湯渣既，所以我比左佢飲。如果鍾意食湯渣既朋友應該會鍾意呢到既中湯，但如果好似我咁唔食湯渣叫西湯應該會好啲。
3.香芒牛油果苜蓿手卷
我無諗過呢個手卷成個都係苜蓿無飯，所以第一啖咬落去覺得好新奇，配埋芒果、牛油果同埋沙律醬好似用紫菜包住沙律食咁，而紫菜非常脆，口感層次好豐富，有驚喜。
4.露荀黑松露意大利飯
個飯有好多唔同既菇係入面，配一枝炸左既露荀係面。平時食黑松露意大利飯好容易好膩，但因為呢個既配菜係露荀同菇，所以可以平衡返。同埋啲菇既份量真係比得好多，菇同飯個比例係差唔多一半一半，對於我呢啲鍾意食菇既人黎講真係覺得好正！
5.牛肝菌炆伊麵
呢個真係完全超乎我地預期咁好食，我不嬲都覺得伊麵淨得芝士龍蝦伊麵係好食既，其他紅燒同炆都麻麻，因為平時去飲啲伊麵都係用黎比人飽肚，好食極有限，但呢個真係完全唔同！本身叫呢個都係為左試下牛肝菌，但估唔到個伊麵竟然咁出色，唔單只係煮既時間啱啱好，食到好滑又唔會太淋既伊麵，重要連個汁既調味都非常唔錯。而且呢個既菇係重多過頭先個飯，食到後尾係菇多過麵，真係好足料。呢個係成餐飯我最推薦既一道菜！
6.椒鹽靈芝菇
呢個椒鹽唔係好似平時食大排檔嗰啲咁重味，佢無平時嗰啲咁咸，但又多左好多香料味，會令人食到停唔到口，而且炸得好乾身，外脆內軟咁好過癮。呢碟野比想像中大碟，我覺得兩個人食會太多，四個人share會好啲，話晒都係煎炸野，少食多滋味。
7.腐皮卷
呢個腐皮卷好得意，係用啲腐皮包住支雪條棍黎炸，包到成個雞搥咁，之後再配個泰式辣醬點。隻泰式辣醬好似同平時m記嗰啲唔同，係稀啲同辣少少，應該係自己整既，同個腐皮卷都幾夾。腐皮卷既腐皮豆腐好濃郁，炸完再香口啲，幾好食。
8.檸檬乳酪蛋糕
呢個比想像中細件，係一舊小正方形咁既size，不過個set又有湯又有手卷同前菜，所以未食甜品已經飽左八成，個甜品細細舊都ok。呢個檸檬乳酪蛋糕檸檬味幾重，但少少偏酸，但以唔洗加錢包埋既甜品黎講其實都ok。
整體來講，服務同環境都唔錯，食物選擇唔算好多但整體食物質素都唔錯，唔係以前舊式素食咁黎黎去去都係啲乜齋乜齋，有好多有新意既野食，完全唔會比人覺得食素係好痛苦既事，因為有啲野整到比肉重好食，如果可以食到呢個質素既野我覺得成為素食者都唔係一件難事，哈哈。今次我地兩個人食左五百幾蚊連加一，如果下次有時間希望試下呢度個lunch,好似都幾抵食！
張貼
