阿銀冰室 (已結業)

旺角朗豪坊後面上海街有幾幢百年唐樓被活化成小商場，叫618上海街，裡面有工藝品店、古著店、懷舊雜貨店、餐廳等等，雖然規模不大，但鋪頭吸引度我覺得大過PMQ，餐廳亦坐得舒服，係旺角少有幾好hea的地方。今次選擇係「阿銀冰室」食個下午茶，店前櫥窗擺放左好多80年代卡通文具陳列品，裡面卡座枱面都有，懷舊感十足。冰室本身賣的其實都係一般茶餐廳食品，下午茶都係多士、西多、雞翼薯條等等。蔥花蛋多士（三十幾蚊）雖然簡單，但出乎意料地好食，炒蛋分量十足，蔥落得夠多，上枱時超級熱辣辣（店員提醒趁熱先好味），多士烘得夠脆，蛋唔老仲保留蛋汁，調味唔重手，蔥花已足夠提升味道，算做得幾有誠意。西多士（三十幾蚊）冇咩特別啦，不過用的係煎的方式，冇咁熱氣，只係裡面有我唔喜歡的花生醬餡，扣左點分啦（我唔鍾意西多有餡）。點左杯茶走，係因為入店前已聞到好濃香沖奶茶的茶香，入口都幾幼滑順喉，茶奶比例做得不錯，只係杯身唔夠厚，會快一點變涼。要一提係呢度服務態度幾好，會細心問你需唔需要信封裝口罩，食完會問你食物質素可好，埋單後仲可以係店前貨架免費㨂一件文具或小擺飾，加上地方闊落乾淨，總比附近茶記好得多。