新聚會 (已結業)

唔知係唔係因為經濟好轉，有一陳年項目終於收到錢，雖然唔係收齊但有份參與的同事終於有糧出。既為慶祝亦為聚舊，所以上星期安排在這裡食番餐。晚餐以自助餐形式進行，地點這裡的大廳，有舒服疏化椅亦可以唱K，想打牌的亦可以安排，但今日洋人多，時間又唔係多，所以只係傾下計唱下歌就食野。我們廿多人，私人會所的自助餐食物的種類當然不能與酒店的相比，但都足夠同幾好食。沙律吧選擇不多，只係菠蘿、粟米、番茄同生菜等，沙律醬都係得兩三款，但都算新鮮，不俗；冷盤是豉油雞同鹵水鴨胸，兩種都入味亦幾好食，呢兩味野都唔知可以食到幾時，一於食得就食；湯是一中一西，但就以個粉葛魚湯受歡迎過羅宋湯好多，連鬼佬都飲老火湯，真係比好多本地薑識食；熱盤有椒鹽蝦、咖哩鴨、清湯腩、粟米魚柳、陳皮骨同菜等，菜色份量足夠，亦夠熱，其中最喜歡吃清湯腩同陳皮骨，其他菜色就以椒鹽蝦較受歡迎；亦有肉醬意粉同飯，實食得飽；甜品是鮮果拼盤同芒果布甸，芒果布甸都算味道不錯。每位200蚊，酒水另計。包廳要廿人起，呢個價錢都算抵食。