嘆甜品

營業中

休息中

晚上十點幾，屯門仲未收嘅餐廳無幾多間，有料果邊攞飛要等八張枱，兜咗一圈去咗嘆甜品食野算。唔洗等位可以直入係幾好，場內其實八成嘅枱都係點窩夫。but...我地叫咗個綜合水果茶，炸燒賣，同珍珠芋圓愛玉。水果茶無得少甜走冰，相信依賴溝糖漿去出味，落少咗冰就溝稀唔到，會太甜。炸燒賣因為有泰式雞醬去點，味道不過不失，感覺似光波爐焗出嚟多過炸嘅。而珍珠芋圓愛玉呢，愛玉正常嘅，珍珠煲得唔夠仲係黏住一揪揪咁，芋圓應該都係出面買嘅現成貨，無乜味，口感又粉又硬，有一粒難食到我忍唔住吐返出嚟。都有要讚嘅地方，呢間嘅工作人員態度好友善好正面。佢地提過QR code落單，不過我地忘記咗，店員哥仔好nice照樣同我地落單；埋單果陣，我細細聲同收銀姨姨講d芋圓好難食，佢即刻話會同返廚房講，仲想補返個芋圓俾我拎走，不過我拒絕咗啦，同佢講唔係想R甜品，想佢地留意返個出品質素啫。