A8's Cafe (已結業)

晚餐訂咗枱，四個人去食飯，咁我同另一個朋友準時去到坐住先，叫咗個沙律食住等。落單時已經有啲奇怪，店員小姐一開始已經黑面，我舉手時佢係無打算過行埋黎，只係企喺個counter度抬高頭望住我等我講要咩，而我係坐喺成間餐廳距離counter最遠嗰張枱。沙律到，刀叉等餐具喺櫃桶有，但無碟，叫佢佢先黑口黑面去攞，攞杯水又係咁，我都唔知我做錯啲咩。有一兩次送餐黎時大大力掉落枱，啲服務衰過一般茶記，連table都係我自己set. 之後，飲完杯水諗住叫加水，佢話每人只有一杯免費嘅水！佢見枱面有三杯，咁佢就拎多一杯黎。唔緊要，一杯就一杯。正要飲時霎眼見到杯中有個影，再望一望，嘩！杯水係污糟嘅！我再舉手，佢又係企喺counter度愛理不理咁望住我，我忍唔住大聲講：「杯水污糟呀！」成間餐廳啲人望住佢，佢死死地氣埋黎收走，一句唔好意思都無，拎返入廚房仲聽到佢發脾氣掉杯，然後從無打算拎過第杯水畀我哋。最後講返啲嘢食，個海鮮risotto只係普通撈咗白汁嘅飯、焗龍脷柳飯同豬手係ok嘅。