裕發茶餐廳 (已結業)

收工都成十點，附近開嘅茶記得番呢間，雖然知道佢唔係咁衛生，但大菌食細菌，眼不見為淨啦，入面都有啲踩夜單車嘅客，呢區都幾流行踩夜單車，而且佢哋仲有自己嘅車隊同制服，都幾型架！我哋坐低叫咗個經濟小菜晚飯套餐 ($73) ，兩餸一湯，包晒以下嘅： 粟米羹：原本係例湯，老火湯之類，要粟米羹都係加5蚊，所以轉咗。粟米羹都夠杰身，不過我覺得鹹咗啲，飲咗一碗就冇飲嘞，老公話味道 ok，佢飲晒！ 霸王雞：當然係雪藏雞，外型都幾似模似樣，一食就知整得太老嘞，硬晒兼冇乜雞味！汁好多，好彩唔鹹，最好味係啲薑蔥。 花膠鴨掌煲：竟然有啲咁嘅菜叫？即叫一個睇吓佢攪乜，花膠當然唔會係好嘢啦，細細隻即食嗰啲，味道整得唔錯；鴨掌好明顯係來貨，個汁就有啲誠意嘞！都算炆得幾稔，可以試吓！ 白飯2碗呢間店出晒名污糟，招呼唔得，邨內係人都知，不過咁夜都仲有飯市我就覺得佢都唔係太差啫！而且唔知點解周圍好似乾淨咗喎！