東悅冰室 (已結業)

長沙灣區近年不斷有新樓入伙，好多新餐廳亦隨之進駐本區。作為長沙灣居民，有新餐廳緊係要試一試佢，今次就黎到位於元州街長發街嘅 「東悅冰室」 。餐廳門口睇一去，入邊裝修的確幾靚，餐牌係本區黎講叫做不過不失，價錢屬於中檔水平。餐廳內嘅空間比較細，但坐位尚算舒適。要試一間茶餐廳嘅水準，必定要先試佢嘅早餐。參考之前嘅食評，發現佢嘅扒餐大件夾抵食，滿心歡喜決定一試。點知意外就開始發生啦，兩位女侍應唔知係無做過樓面定係根本無心做，落單憑自己嘅記憶，一個餐都可以問完再問，堅持唔寫低，結果落到錯晒。再黎，門口一有客，就要求食緊野嘅客左調右調。我明白樓面細，想同時做多幾台客，賺多少少嘅心理，但無理由位都無，仲嫁硬要塞人入去。另外，兩位女侍應亦都明顯唔識得點樣同一時間去應付同招乎咁多客，單又落錯，野又出錯，再不斷要求食客調黎調去，亂過打仗。好彩，廚房不負所望，食物嘅味道都叫做中上，分量亦都足夠，可惜廚房得一個爐，繁忙時間大家預咗無半個鐘都唔會有得食。總括而言，餐廳食物不過不失，但等食物嘅時間太長，樓面嘅情況更加係不能接受，如果唔係個裝修，應該唔會食第二次。