鳳城酒家 (已結業)

昨日個仔term break，唔使返學，竟然給我一個驚喜，六點鐘左右，來公司搵我食晚飯，於是即刻熄燈走人。因為唔趕時間，所以揀旺角鳳城。其實我好少來呢度食野，因為放工後由公司來，剛剛同返屋企背道而馳，唔就腳。三個人，各人點了自己喜歡的食物：炒鵪鶉生菜包、大良炒鮮奶、窩貼明蝦卷、西湖牛肉羹。生菜包、炒鮮奶和蝦多士都是這裏的「名物」，水準穩定。今次炒鮮奶不用瑤柱而用鮮蝦，增加了鮮味但缺少了鹹香，同時也令整碟菜「削」了。所以，我鍾意舊版。西湖牛肉羹這種羹湯，只有這種舊式廣東酒樓才有供應的了。吃它，是一種感覺，與味道無關。餐後送糖水：紅豆沙。到這裏吃東西，食物和招呼都沒有令人特別驚喜的地方，但有其自然和自在之處，有一種廣東人的氣質：不刻意而透著活力。