彩晶軒 (已結業)

之前去過尖東彩晶軒飲茶, 覺得D食物都幾好, 例如菠蘿叉燒餐包, 面頭幾脆, 裡面既叉燒餡料味道又調得唔錯, 最驚喜的是馬蹄糕, 夾住唔會散, 咬了咬仲有淡淡既蔗糖味, 比一般既馬蹄糕多了一份香味, 甜甜的有咬口, 非常特別, 我仲同朋友係咁爭食。 昨晚又去左食晚飯, 今次試左個大蝦沙律, D蝦爽爽地, 同一般沙律差唔多。 另外比較出色既係欖角排骨, 一上菜大家已經覺得伴碟既蕃茄兔仔好得意, 一入口就食到D排骨有濃濃既欖角味, 而且好脆身, 加上有蜜糖吊下味, 都幾野味。 唔夠飽又點個斑球煎米, 為方便大家夾起, 酒樓已先將成碟煎米切成一塊塊, 每塊好似Pizza咁, 餅底就係煎米, 上面鋪滿斑球, D米粉煎到外乾內軟, 外面加D豉椒汁, 脆脆地幾好味。 總的來說, 上菜算快, 食物有一定水準, 可以一試!