Manecy's Studio Restaurant (已結業)

其實之前已經到過依一間餐廳食飯，不過依家換咗招牌，咁就去試吓有乜分別。門面裝修左，簡潔左好多.餐牌改變左，多咗其他主菜，不過最出名嘅鹹豬手依然留咗菜單入面。不過我今次就唔食鹹豬手啦見到有幾個新菜，當然要試吓先！呢一個籠中鳥，一上菜嗰時真係好特別，所有人都攞住佢影相，吸睛率相當高，隻雞都唔細，味道都OK不過佢賣相已經贏咗！慢煮三文魚扒，肉質冇鞋皮，可能係慢煮嘅關係所以肉質熟先可以咁鮮嫩，伴菜嘅薯蓉都幾好食。炭燒煙燻豬肋條，醬汁同煙熏味道幾好，呢個係新菜式烤乳豬，之前都食過，水準保持到肉質都幾鮮嫩。最後就係西班牙海鮮飯，用料好似多咗好多，價錢仲平左少少，一樣保持水準。最後一個甜品，個造型都相當搞笑，好似食泥咁樣，味道就一般啦，不過造型取勝。不過服務方面就好似有啲問題，其他侍應都Ok，就係特別有一個肥仔，唔著制服，T恤短褲，又唔剃鬍，咁行來行去，唔知佢係老闆定睇場，不過做西餐唔係茶餐廳，形象同服務都好緊要！