辛安東元祖奶奶雞 (已結業)

放假本黎諗住同幾個朋友去旺角食日本放題，點知行過見到招牌寫住乜乜“元祖奶奶雞”好得意，細問下原來係食韓國好流行嘅安東雞，雖然都聽完都唔明係咩，反正未試過就入去食下。餐牌上食物唔多選擇，我地就叫左安東雞（小辣），泡菜，燒茄子，真露煮蜆 。 泡菜好快就送上，味道同我地平時食開既有少少唔同，食落口佢特別香，同唔會好喊，感覺唔錯。燒茄子就普通啦，但擺碟好靚，真露煮蜆就好正，同我地平時食開既清酒煮蜆有唔同，佢會再清甜d,食落味道好舒服。可能係即叫即整既關係，安東雞要等左一陣先有得食，不過當我見到成盆安東雞真嚇親囉，好大盆呀，好足了有雞啦唔洗多講，大大舊青瓜，蘿蔔，薯仔，最特別係個底有韓國寬粉，完全無諗過食雞會有寬粉。個汁好野味入口甜甜地，但又帶點醬油香味，加埋小小辣，好岩我地幾個胃口。整間舖裝修好有韓國感覺，坐得又舒服同乾淨，值得下次再黎試。