大榮華圍村菜 (已結業)

星期六日，通常都會同屋企人搭車去遠少少食午餐。之前晏左去元朗大榮華飲唔到茶，今次即管去九龍灣試試。搭車時碌碌openrice，見到點心紙，心入面已經睇中幾款點心，可惜去到發現部分已經轉左款，好似鴨腳扎、臘腸卷都冇左，有少少失望。不過第一次食到幾款懷舊點心，都算嚟得物有所值。首先上檯的係雞球大包。真係要拍埋個茶杯影相，先比較到佢有幾大！份！入面填左好多雞肉餡，食一碟真係會飽左大半。另一款比較滿意的，係同樣咁有懷舊feel的豬膶燒賣。豬膶質感夠粉，底下豬肉同蝦肉都唔死實，味道不錯；另外同平時食的燒賣有一個分別，就係佢唔會用黃色燒賣皮包住啲肉餡，真係要阿媽講到先知傳統係咁。另外都試左煎釀青椒，三片填滿魚肉，份量頗足。潮州粉果外皮太厚，同時厚皮唔代表包得好，有一個上檯時已經爆開。當歸豬腳不錯，有清淡的當歸味道。