花川湘薈 (已結業)

與朋友相約聚舊，朋友知我心意鍾意吃辣特登約我此食店食川湘菜。入到食店感覺幾優雅，而且帶有中國特色的裝飾，滲透古典美。茶杯幾靚！餐單上有唔同風味選擇，有渝風篇、花湘篇、泡椒篇、乾鍋篇、水煮篇、酸菜篇等，似乎就算係「辣」都可以有唔同嘅烹調方法，確實很吸引。檸檬泡椒鳳爪~呢一個係小食類別，見到呢個菜名就估到辣辣地又帶點酸酸地。我都忍唔住用手攞嚟食，鳳爪肉實不稔，食下一隻、食下又一隻，滋味。橋邊陳麻婆豆腐~平時係其他餐館都有食麻婆豆腐，而呢碟麻婆豆腐喺辣還帶香同麻。豆腐幼滑，絕對係伴飯佳品。張飛牛肉何謂張飛牛肉？原來是其“表面墨黑內心紅亮”就似張飛，味道方面，食落有點似牛肉乾的韌度，而肉上面已有一些香料，食落帶少少咸香也有少少辣，適合用來佐酒。還有些紅蘿蔔絲、青瓜絲、芫茜、蒜頭，可以連牛肉一齊放入口，口感層次很豐富。担担麵~麵身幼細，面上鋪有肉碎同葱花，湯頭不算辣，唔想食飯可以食麵也不錯。桂花杞子冰粉~有趣的一道甜品，每粒冰粉都咁晶瑩通透，就好似水晶咁一閃一閃，口感似黑色嘅涼粉，加上一啲黑糖槳，好味喎。呢餐川湘風味唔錯，「辣」得有心思。