Beerliner German Bar & Restaurant (已結業)

星期五team lunch，特登想揀間好D嘅，點知又中黃埔魔咒。真係好奇怪架，無論邊間連鎖分店喺港九新界幾咁好食，一入黃埔新天地就變成垃圾，呢個魔咒實在解唔到... 😖我原本嗌煙肉龍脷卷，點知廚房話無，咁咪跟同事嗌肉眼扒，無論喺medium rare 定well done，碟碟都無牛味，仲韌到橡皮，𡁻到個個牙軟叫救命，仲放棄唔食。薯角份量少，不過無所謂，因為又腍又謝完全唔好食。坺酸菜... 酸菜？！ 毫無精萃，應該係沙拉醬醃菜。另外叫左燒春雞同豬手嘅同事亦唔見得好幾多。隻燒春雞又乾又硬，無塊嫩肉。真係春雞？ 迷你老雞就真啦。豬手望落好有氣勢，點知用刀好難鋸得開，真係想借把電鋸鋸開佢。齋切未食已經好勞累，仲要放入口係咁𡁻簡直係一場苦差，真係辛苦晒果位同事 😅沙律菜加blue cheese okay 👌🏻 湯一般。我地唔會再嚟，on our black list~ 完。