汀角灣燒烤農莊

營業中

休息中

Item: 汀角灣燒烤農莊
Rating: 3
Author: 奧志雷

Ting Kok Bay BBQ Farm

3.5

92 食評

味道

環境

服務

衛生

抵食

4219

大埔

$101-200

港式燒烤燒烤場

奧志雷

等級4

2.1K

由新娘潭行到大尾篤燒烤，最初係想去巴希雅架，點知話已經訂滿左，無位燒。唯有轉去上星期到訪過間嘉年華，但居然比劉德華包左場見 fans 囉！仲圍晒黑布，搵埋食蕉係門口守住添呢，守衛深嚴，亦禁止陌生人接近。最後貪近是但隔離汀角灣試試，還掂未試過。

大門口接代位妹妹好有禮貌又熱情地接我地入場，再搵另一位哥哥仔簡單介紹食材、設置、地形，最後再搵位叔叔開爐，安排十分暢順舒服，比起嘉年華話之您既服務態度好好多。叔叔仲任我地自己揀位，決定走到最遠處較空曠位置，最開揚而空氣流通。

不過最可怕、最恐怖係個洗手間，非常簡陋又嗅到不得了，可以跟大陸鄉郊比一日之長短﹗第一次入到廁所走返出黎，環境太惡劣頂唔到。但飲左幾支啤酒後點都要去一去，我全晚只係閉氣去過一次就唔敢再去喇 ﹗

朋友仔因太肚餓所以急急自己親手下廚，我都甚少有朋友仔服侍，依家只需要企係度等食就得喇，真係難得，爽呀！太開心喇，哈哈 ﹗

汀角灣可以揀港燒或重慶串燒，食材同價錢都完全一樣，亦都會提供辣粉及孜然粉。

第一轉通常都係燒腸仔先啦，個火實在太猛又唔平均，有部份燶晒，而有部份就仲係凍冰冰囉，我地又調較唔到碳火呢，如果個爐可以調高低就更好啦。

有廚師腸、蒜香雞中翼、香辣雞中翼、黑椒牛扒、金沙骨、等等，不過去到自取食物房時，見到大部份既盤都吉晒既？無野食？個賓賓服務員仲做到發晒脾氣，fill 唔切貨，而且有同事射波無返工呢﹗

聽到話因為劉德華包左嘉年華場、巴希雅又滿座，所以人群擁晒黎汀角灣，無諗過今晚會多客得咁利害，連贈送既大蝦、活蜆、菠蘿都唔夠用，老闆即飛車出大埔補貨呀﹗我地要晚一點先有得攞啊。

廚師腸，唔係假腸、唔係大陸腸，堅係美國廚師腸，Good 喎﹗烤到外皮微脆、腸身發賬就係最好味既時候喇﹗咬落熱辣辣出晒煙，肉汁激射，口感濕潤，好味道。

蒜香雞中翼，蒜味突出，醃味可口，皮香肉嫩。香辣雞中翼，非常微弱辣味，甜味更強，味道都不錯。黑椒雞全翼，燒到燋香促使黑椒味更香濃可口。

黑椒牛扒，當然穩陣食全熟啦！肉質略乸不過份，依然有點咬口，肉汁澎湃，黑椒味香甜輕辣仲有燒烤香氣，好味。

金沙骨，半肥瘦有肉食，肉質彈彈帶嚼勁，淡淡叉燒醬味道，醬甜味宜人，正呀﹗雞扒，好食噃，調味剛剛好，雞肉香甜嫩滑又多汁﹗

我地已經食到好飽喇，中場休息。仲有兩位九龍朋友仔搭緊車黎汀角灣 join 我地呢，人齊先開始下半場，繼續食唔好停，呵呵呵。

入夜真係爆晒場喇，坐無虛席！連爛地泊車位都塞到滿滿密麻麻，經常聽到廣播搵車主移車呀。還間中聽到劉德華係隔離嘉年華度唱歌同講野囉。

剛才入場時我地只有三個人，依家再加兩位九龍朋友又要再排過隊喇，見職員做到霖晒檔又踢晒腳，真係多謝劉德華給他們難得的考試，壓力測試！睇黎汀角灣重來未試過爆場到滿瀉，今晚好生意爆晒數啦。

汀角灣老闆終於入完貨返黎，有菠蘿、金菇、活蜆同海蝦攞喇﹗真係抄足巴希雅喎，係少左香蕉啫。海蝦，新鮮度極高，啱啱買返黎麻﹗爽甜多汁，無得頂﹗

蜆煲，完全無需加水架，焗焗吓活蜆就會出水。海鮮最緊要新鮮，任何調味都唔洗添加。大家都激讚個蜆煲正到不得了，蜆肉肥美鮮甜又彈牙，天然海水咸香飄飄﹗

燒菠蘿，水份被蒸發使到菠蘿更甜，加上燒烤味芬芳都唔錯。錫紙焗牛油金菇，大路普通，牛油甜美夾著爽爽金菇，滿意。

雞扒同金沙骨最好味，大家都讚好食過嘉年華，又無麥師傅咁濃味，添食再添食。其實有秀珍菇、韮菜、秋刀魚燒架，無攞啫。我唔食青椒架，所以唔知好唔好食。

牛舌，我從來未食過腍劈劈牛舌，仲要勁羶，咬左啖就掉左喇。貢丸、墨魚丸，味道好咸，質感粉到不得了，大家都只係試左一啖仔放棄，平價貨。

蒜蓉扇貝，好美味呀﹗雖然係急凍，但味道都唔差，非常鮮甜﹗帶子內棉滑彈彈，橙色內臟甘甜無比，熱辣辣整隻掉入口，心心眼都出埋！扇貝要另外買的，不在任食套餐內，推介。