心夜來潮 (已結業)

哩日老婆心血來潮約我同一位好友去心夜來潮食晚飯,三個人出街食飯就可以試多D菜式,入到店内發覺D位幾闊落好坐,坐低後立即打開本設計得好骨子嘅menu,交頭接耳咗ㄧ輪之後決定㸃以下菜式:1.爆炒醬啫秋葵香辣惹味肉碎拌爽脆秋葵,用熱辣辣嘅石鍋上,一食就好想叫碗白飯,不過我哋早已柯打咗飯,就係...2.生拆原隻蟹肉蟹膏撈飯上菜時個炒飯係同蟹肉蟹膏分開上,再由店員响我哋面前將蟹肉蟹膏撈落炒飯喥,哩鍋炒飯食落幾乾身,而且仲幾大兜吓,其實menu都已經寫到明係四人份,我哋三個今次真係眼闊肚窄,但既然叫咗就唔好做大嘥鬼,一於努力食晒佢!3.潮式香辣魚仔炒新鮮蟶子王蟶子王大大隻,香辣魚仔係哩味餸嘅亮點,夠晒香口惹味!4.傳統鴨蛋煎蠔烙蠔烙勁推介,金黄香脆蠔仔又肥又多,食到心花怒放!有圖有真相。5.海豐小米餃第一次食哩款餃,外皮嘅食感似粉粿,裡面個餡料食落似雲呑,新奇有趣!非常過癮!6.秘製新鮮豬手墨魚脯煲豬手燜到離晒骨,索晒墨魚味入D肉裡面,個汁好濃好好味!又一煲送飯妙品!食咗咁多香濃惹味嘅嘢,我建議大家飲萍果醋嚟為哩個豐富大餐劃上完美句號,舒服晒~~~menu中仲有好多吸引美食,真係要嚟多幾次至食得晒