Explorer Fusion Restaurant (已結業)

之前聽同事講沙田有間食fusion菜好正，所以今日收工約咗家姐一齊去試下，餐廳位置其實都好方便，搭馬鐵去石門站然後行十幾分鐘就到！去到門口發覺佢係一間酒吧餐廳既設計，而且設有outdoor座位，如果天氣涼，一大班可以坐係外面飲下酒吹下水確實好舒服！不過我地去到個陣outdoor已滿，所以唯有坐入面！之後我地拿拿聲叫嘢食，因為已好肚餓，首先上菜係有機番茄水牛芝士沙津，佢地既有機番茄真係好甜好多汁，再配埋自家製香草汁同水牛芝士，成個沙津食完變得更開胃之後上既主菜係是日精選刺身拼盆，所有食材都係由日本同加拿大空運到港，絕對新鮮，首先要講佢既海膽來自加拿大，成舊糯米糍咁大舊，食落鮮味十足，一點腥味都冇，加上有少少海水味，一個字”正”而佢既帶子成個金幣咁大，又大又厚，肉質鮮嫩，但最有驚喜係三文魚腩同吞拿魚腩，每一塊刺身既油脂同魚肉比例比例都剛剛好，有一種入口即溶既感覺最後我地再叫咗個意式燒春雞配紅酒燒汁，首先佢雞肉燒得剛剛好，配上佢地特製既紅酒汁同熱辣辣既脆香薯條，簡值人生一大享受！