營豐海南雞專門店 (已結業)

今日比較忙，下晝兩點左右先食晏，街外太陽仲好猛烈，就去附近買個外賣，海南雞飯平時就食得多，今次就試吓鹽水鴨飯。$45 有白飯同薑黃飯可以揀，咁就梗係揀薑黃飯啦！仲有醃酸蘿白做伴菜，好醒胃跟埋一碗每日不同款嘅例湯，今日係去濕冬瓜湯，估唔到連湯品亦無馬虎，好足料，飲哂成碗都唔覺有味精，讚👍🏻一份大約有10片鴨肉，佢哋精選嘅鴨係少脂肪，唔會太肥膩，皮薄、骨軟、肉嫩，鴨味重，用花椒丶八角丶冰糖等香料秘製，夠晒入味！每啖都覺得好幸福！忍唔住揀咗雞腎試吓，自私食買咗$20，約11片(厚切版)，如果食得辣嘅朋友，佢哋係可提供口水雞汁作調味，可辣可唔辣，任君選擇；雖然夠腍易咬，但少少意見，如果雞腎薄切一點會更好。除咗招牌嘅海南雞丶加積鴨外，呢度仲有多款小食例如無骨豬手丶泰式豬頸肉丶泰式鳳爪丶鹽香雞翼丶香茅豬扒丶酥炸雞球等等…聽老闆講，佢哋第一間店喺柴灣丶第二間就係呢間西灣河店丶再擴充到去鰂魚涌，可見呢間海南雞飯專門店都有一定嘅捧場客。老闆熱情好客，價錢合理丶好味又飽肚，急不及待要即刻推介，街坊們必試！