Pho Metro (已結業)

放工約左男朋友去銅鑼灣睇戲，睇完戲去左Pho Metro食肚。鋪頭裝修設計簡潔舒服。特別牛肉湯河 - 配料有生牛河、腩片、牛丸、牛柏葉，每一碗Pho均附有一些配料，包括芽菜、青檸、九層塔及薄荷葉。牛湯顏色半透明，無乜油光，湯頭飲落清甜順口，幼身的河粉掛汁力強，口感好好。生牛肉脂肪比例剛剛好，好香嫩；牛丸腩片彈牙無渣。 蟹膏湯檬 - 聽講製作方法係將把鮮蟹盅碎，脫殼取肉取膏，再加洋蔥番茄熬煮至少3小時，難怪湯底味道咁鮮甜，蟹膏味濃郁。配料豐富：有蟹肉餅，豬肉、豆卜等。檬粉分量好多而且好索湯。 芒果紙米卷 - 包裹得層次分明，紙米卷外皮煙韌，內裡有新鮮芒果夾住沙律菜同埋肉碎，有點酸香甜味，配埋濃郁的醬汁，好開胃。 煎蝦餅 – 外脆內軟，唔會煎到好油，蝦肉夠鮮甜，肉質彈牙。炸春卷 – 外皮炸得好香脆，裡面餡料好豐富：有蘿蔔絲、粉絲同埋雲耳絲。 牛油果沙冰 – 好幼滑，唔會太甜，感覺好fresh。