新香園 (已結業)

知道新香園既蛋牛治好出名，但係一直都無機會去試下。有一晚十一點幾活動完左，幾個人終於去左深水埗新香園。鋪位有幾大一眼睇晒，入面空間其實都有少少窄，唔算容納到好多人。接近凌晨既時間，個到仲係有好多客人，不過好彩都係等左幾分鐘就有位。我地六七個逼左係最入面既一張圓檯到，雖然食野要就住，不過可以接受！入面既環境係正宗港式茶餐廳咁樣，好有懷舊既感覺。我地每個人都嗌左呢到既招牌蛋牛治，朋友既係烘底，食個陣仲出緊煙既，多士好香好脆。我無嗌烘底，但係一樣咁吸引，尤其係入面既蛋好軟，而且仲係未完全熟既，咬落去個陣會有少量既蛋漿，但係又唔會多到滴出黎。牛肉唔硬，同蛋既比例都好適中，個個都大讚真係好好味！除左蛋牛治，我仲同朋友share左一件西多士，加左煉奶，就咁睇賣相已經覺得好吸引。我個人就比較鐘意食脆脆地既四條邊位，口感好好。煉奶幾甜，但係唔會覺得膩，同人分既份量剛剛好。可惜個日唔記得左試奶茶，不過見到唔少其他客人都有嗌，應該幾受歡迎，下次有機會一定要試！