焼肉スマイル (燒肉smile)

燒肉smile原來就喺旺角文華廣場1樓，環境企理衞生，抽風幾好，場內零煙味。有個冷菜吧同沙律吧可以任食，小菜款式多又好食，沙律醬都好多款，仲有芝士粉添；我朋友就鍾意食泡菜同韓式海帶。佢嘅燒肉套餐會包一份肉品、一個主食同一碗湯，我哋就另外加錢叫咗個甜品。肉類會跟據等級而有唔同價錢，我哋就叫咗一個398嘅日本A5極上和牛同一個118嘅美國板腱牛套餐，最後兩個餐都冇令人失望。A5極上和牛油脂豐富，入口即融，口感細膩，比得上嚟日本食過嘅肉，肉汁豐富，而且份量好足，厚切起上嚟帶有嚼勁；至於美國板腱牛就口感彈牙，肉量剛好，食得滿足，牛味十足，不得不提佢嘅韓式醬燒，唔會搶咗主角嘅風頭。點都要讚下佢嘅焦糖歐蕾，淨係需要加15蚊就食到，焦糖面好脆，歐蕾（應該即係布丁）夠哂滑，係食完燒肉之後，一個平衡嘅收結。