牛霸王

營業中

休息中

今晚去左觀塘成業工業大廈一樓嘅日式漢堡扒，丼飯專門店食晚飯。餐廳唔係好大，裝修簡潔，座位下有置物籃，好貼心。我叫左 招牌手打和牛漢堡蘭王蛋飯，配芥辣酸瓜，汁配秘製漢堡汁。一上枱已經覺得好有心機，一層層砌好，清楚望到所有配料。原味試一試橙紅嘅蘭王蛋黃，蛋味濃郁，帶鮮甜味，口感厚身滑溜。蘿蔔蓉冇太多調味，冇渣，食落清甜，軟綿綿。芥辣酸瓜，冇想像中咁搶味，芥辣，酸味，都係輕輕，整體同成個飯嘅汁同漢堡扒都好夾，唔會喧賓奪主。漢堡扒，煎到微啡，望落唔會散收收，有夠哂厚度。咬落好香牛肉味，雖然係漢堡扒，但仲食到牛肉嘅口感，肉汁都保持得唔錯。好高質！秘製漢堡汁，調味係鹹甜，餸飯好開胃。另外加配吉列炸蠔。炸蠔雖然唔係好大隻，但炸得香脆之餘，蠔唔會過熟仲係好juicy,鮮甜。另一重點，係配嘅醬都係餐廳自已調配，欣賞呢間餐廳調味點到即止，唔會過重。個醬用左雞蛋，酸瓜，洋蔥粒加上蛋黃醬，好清新，我成個醬清哂，好味！！飲品加配蜂蜜綠茶。綠茶有幾濃嘅回甘，第一啖係蜂蜜甜味，之後慢慢就出到回甘香味。餐廳喺工廈未必咁容易發現，但呢間高質有誠意嘅餐廳，值得一訪！