四川重口味

營業中

休息中

筲箕灣東大街出曬名好多選擇，好多美食。今日適逢重遊舊地，見到呢間四川菜新開張，天氣又轉冷，急不及待要試一試。餐牌好多選擇，基本四川名菜、冷暖熱葷都好齊全，亦好似好吸引。幾經掙扎之下，叫左四川龍騰雞煲，酸菜魚，同埋冷盤萵筍。四川龍騰雞煲叫左小辣，但濃香味重，雞件數多，肉質都好嫩滑，入面仲有惹味既洋蔥同蒜頭同埋索曬辣汁既薯仔，真係食唔停口。酸菜魚呢個菜式理應唔洗再多介紹，但係重口味既酸辣調味調到剛剛好，食完唔會口乾，鮮嫩既魚片多到2個人都食唔曬。冷盤萵筍特意叫左呢個，可以中和食雞煲同酸辣魚嘅辣味，2個人食都好夠飽。其實餐牌仲有好多好野食，例如孔明烤魚等，舖面積都好大，分兩層，啱曬同成班朋友或者約屋企人再嚟食雞煲打個邊爐。