大發茶餐廳 (已結業)

潮州打冷近10年都好似不繼減少，要不就要去高檔既潮洲菜館，下下兩個人幾百蚊落樓。細細果穿住對拖鞋落樓下果種街坊式潮洲打冷風味，似乎消失左！好明白既，香港 d 舖租咁貴，一般個體戶點捱得住呀！大發茶餐廳單憑個名唔會令人聯想到潮州菜，但只要去到門口，右手邊整個厨窗都係熟悉既潮州餸。事實上大發真係係好茶餐廳，食物除潮州打冷外，仲有廣東小炒，風味炒蜆、蟶子、三文治、咖啡等。食客可以食完潮州菜再飽杯咖啡，各式其式，任君選擇。 卥水三味(掌翼 + 大腸 + 墨魚)：鵝掌翼較為咸左d，其餘兩款都好味。 雜菜煲：大發既雜菜煲好抵食，不單菜多，仲有蝦、鮮魷，應該改名為海鮮雜菜煲。最鐘意佢既味道夠清，清得黎又唔會淡而無味，唔係用味精砌出黎既！ 豉汁蒸倉魚：份量足，夠新鮮，每次都會食大發既蒸魚！環境：香港地道食肆，純街坊形式。服務：一般老式香港既親切服務，唔可以講究。有跟老闆頃過如果可以增加一d 舊式潮州菜，例如花生炆雞脚、蘿蔔炆大蟮、酸菜炆門蟮等會更吸引。但可能成本問題，仲有要考慮適應街坊既需求高低，至今都無出台，期望一日大發有機會可以比我地試下新菜啦！