森記牛雜粉麵

營業中

休息中

今日同 buddies上網搵吓公司附近有咩食，就搵到呢間位於青山道嘅森記，雖然都大概有10分鐘嘅路程，但因為我哋鍾意試新嘢，所以都唔介意行吓。原來呢度有室外同室內嘅位置，而且就喺馬路旁邊，好適合夜晚揸車過嚟食宵夜。餐廳仲用上上海懷舊風情的佈置，估唔到呢間小店都幾有特色。呢度除咗有粉麵之外，仲有小菜客飯供應。先嚟一碗雲吞墨丸麵，雲吞同墨丸各有三粒，自家製嘅雲吞特別好味，而麵質亦都非常爽口彈牙。另外仲叫咗脆炸蜜糖雞翼，小菜會包埋白飯同紫菜湯，咁都只係$48，真係好抵食！脆炸蜜糖雞翼總共有五隻雞翼，仲要係好大size嘅雞翼，外面炸得非常脆口，亦都食到甜甜嘅蜜糖味，而雞翼炸得啱啱好唔會過熟，所以仍然保持住鮮嫩嘅肉汁。我哋仲揀咗秘製沙嗲牛腩，同樣係配埋白飯同紫菜湯。呢個秘製沙嗲牛腩真係冇得輸，首先佢係採用崩沙半肥瘦嘅牛腩，所以肉質零捨滑，入口即溶，然後佢嘅靈魂就喺個沙嗲醬入面，原來佢嘅沙嗲醬係佢哋自家製，微辣中帶點甜，啖啖充滿花生香，非常香口。無論叫粉麵抑或小菜客飯，都可以加$15配油菜，呢度真係幾抵，連油菜都大大碟。佢嘅沙嗲醬實在太好食，所以我仲買咗一樽返屋企，今晚可以整串燒啦！