築間酸菜魚

今日嚟到銅鑼灣呢個繁忙嘅地區，有一間樓上舖，超巨型玻璃窗，外面係銅鑼灣特色樓景，打卡必去。餐廳鄰近地鐵站，好方便。香港好多食酸菜魚嘅餐廳，今次呢間比較特別，係台灣特色酸菜魚，酸菜魚係主打，除此之外，仲有好多款唔同味道嘅魚可以選擇。當然我叫咗一份台式酸菜魚，台式中式分別好大，呢度嘅酸菜魚湯底好濃好香，魚肉片好滑，唔會太辣，相當美味。除此之外，我仲嘗試咗一款中西合璧嘅菜式。明太子忌廉白汁煮魚，魚片同酸菜魚入邊嘅一樣，好滑、冇骨、好易入口。而湯底就好特別，有少少似白汁意粉醬，好香滑，同樣好好味。小食有：外脆內軟嘅台式炸物「鐵漢小酥肉（椒麻味）」，味道唔辣，台式鹽酥雞嘅椒鹽味道，炸到脆卜卜，好香口。另外仲有「百花釀油條」，油炸鬼入面包咗墨魚膠，爽口彈牙，充滿墨魚嘅鮮味，味菜式好特別，而且配合得非常好，值得推介。「椒鹽豬肋骨」 大大件，好多肉，肉質鮮嫩，好好味。最重要係有超大杯冰凍而解渴嘅飲品，記得必飲。最後食埋個燒先，好滿足。店員服務非常周到，值得加分，一定要再嚟光顧。