喜點.鮮鍋粥底火鍋點心專門店 (已結業)

之前嚟喜點食過粥底火鍋，今次試吓佢嘅忘不了海鮮火鍋套餐。每位$298可以食兩個半小時。最矚目當然係龍蝦加5款時令海鮮，包括蝦、蜆、鮑魚、帶子等等。鮑魚有半隻手掌咁大，肉質厚實，幾鮮甜。龍蝦size都幾大，肉質非常結實，美味可口。蝦得兩隻既話我覺得比較少，不過肉質有彈性，一樣都係非常鮮甜。值得一讚係餐廳提供筲箕俾我哋碌啲蜆，非常方便。蜆無沙非常抵讚，味道亦清甜。除咗海鮮拼盤之外，套餐仲包括多款水餃、丸類。我最鍾意當然係蟹肉黑松露味餃另外仲有兩款炸物，分別係即炸響鈴同蝦油條。平時飲茶食蝦多士食得多，蝦油條一定未試過，口感更加香脆。另外即炸響鈴熱辣辣，就咁食都冇問題。肉類方面可以揀頂級安格斯牛頸脊或櫻花黑豚肉。作為牛魔王嘅我哋當然揀前者，每人有4件左右，牛味非常濃郁。套餐有大量配料無限追加。不過食晒上面講過嘅食物都有八九成飽，可以叫左菜同鳥冬。每人仲有一大支竹庶茅根，真係非常抵食。