滾喜火鍋專門店 (已結業)

好耐都冇食雞煲喇🤤🤤🤤今晚一定要去煲一煲呀。第一次黎滾喜火鍋專門店，入去涼浸浸，好舒服。呢度佈置幾特別，有懷舊感覺，薈萃教堂玻璃嘅特式風格，感覺高貴清新。水吧位有冰室嘅格調，整間食店非常光猛，十分舒適。最可愛係熱情又主動嘅侍應叔叔，講野好似舊時年代嘅人，好似睇緊懷舊香港咁😂😂呢度係任飲任食，有不同收費$188/$208/$278，視乎自己想食咩牛黎揀，我地揀左中間價，食安格斯牛。揀好餐就黎麻辣招牌雞煲喇😋點左個微辣，本來想食芝士，但老公食唔到冇叫。一開蓋已經聞到濃烈嘅麻香味同好香嘅葱味。個醬汁真係香味濃郁，個汁會愈煮愈濃，好彩叫微辣，初初入口勁惹味，愈食會愈辣，但仍然好好食。雞肉嫩滑啖啖肉，份量唔夠唔緊要，因為可以再添。加入好多芫茜，將成個雞煲帶上另一個層次，芫茜控大愛。食完雞就加湯打邊爐，中和返雞煲本身嘅辣味，味道剛好。其他食材有安格斯牛，口感軟腍，牛味濃郁，就算滾得耐左，亦唔會有嚡口和同韌嘅感覺。無限添加，都係保持質素。另外有新鮮蔬菜，海蝦，丸物，餃子，大大午餐肉，黑椒味香濃嘅牛丸，魚皮，響鈴等等，全部食材幾新鮮，唔錯😋👍