唐記包點 (上水中心)

營業中

休息中

唐記開到成行成市，梗有一間喺左近，對香港人黎講真係好方便。因為連續三日都要同家姐兩個自己食自己，所以就買唐記去解決我地其中三餐，可以講既係，真係快靚正，而且好抵食，雖然好多人排隊，不過店姐姐速度都好快。我地既晚餐有雞扎、豉椒鳳爪、香煎牛肉包、香煎蔬菜香菇包同煎鍋貼。雞扎用腐皮包住豬肚、豬皮、芋頭、雞肉，腐皮好淋身，同豬皮一樣都係吸晒啲汁好好味，豬肚好淋，芋頭好粉好靚，雞肉正常。豉椒鳳爪蒸得好淋好入味，甜甜地辣辣地，好惹味。由於見到有新出既香煎風味點心，$15就有三件，當然要買黎試下啦，買左香煎牛肉包、香煎蔬菜香菇包同煎鍋貼，外層煎到脆面，而且熱辣辣，好香，入面個餡都算多，最鍾意佢個香煎蔬菜香菇包，入面啲蔬菜仲好有咬口好好味。有時食早餐都會食中式包，於是我買左兩個凍包可以朝早自己蒸熱做早餐。蕃薯包好軟熟，番薯蓉好綿密但唔會好甜，唔錯。榨菜肉包好香，每一啖都食到榨菜同豬肉，口感好好，好味。另外買左個鳳爪排骨飯自己第二日當lunch，估唔到個飯都幾大盒，排骨都有好多件，而且好多肉，加埋鳳爪辣辣地，好惹味。