海傍陳記 (已結業)

難得有一日可以早放，約左個fd黎西環想搵下野食啦。行行下見到呢間鋪好有懷舊氣息，無論牆 枱定係椅都係有8 90年代果時嘅感覺。入到去坐低，即使我地得兩個人，都好似好耐冇食野咁叫左好多。首先叫左碗碗仔翅，一黎到就睇到佢用嘅碗係上一輩好興嘅雞公碗。呢碗只係十幾蚊嘅翅可以咁大碗真係好難搵。味道就唔算好出色，都叫做正正常常咁啦!之後再黎一碟齋腸，我個人就唔太鍾意甜醬麻醬，但係淨用豉油都好好味，腸粉好滑。咖哩三寶，佢d咖哩係好茶記feel嘅咖哩，港式咖哩。魚蛋唔算好彈牙，不過過得去啦。食得魚蛋冇理由唔食埋燒賣加嘛，我地叫左個xo醬燒賣。佢d燒賣全部都炸過嘅，好脆，加埋xo醬幾好食。我地見冇主食就叫左個沙爹豬頸肉撈公仔麵，撈起身都ok嘅，但略嫌普通，可能下次試下雞 豬會好d。最尾我地叫左個豬扒包，佢嘅豬扒包好好食，岩岩焗起個包好脆，塊芝士係凍住咁放上去，黎到嘅時候都仲未溶，可以係食嘅時候等佢溶，塊豬扒夠味岩岩煎嘅。呢樣野好值得推介。到最尾我地兩個要抱住個胃咁走，但係其實佢價錢唔算太貴。係好滿足嘅，忙完一輪之後有得咁開心咁盡情食野係好難得架，下次一定要再去食多次。