香江花月 (百誠大廈)

營業中

休息中

大熱天時開住冷氣打邊爐係香港人傳統，收工個陣條邊爐癮起，即刻睇下附近有冇乜好地方止下癮，揾下揾下就見到呢間香江花月，就衝上去睇下有冇位。去到門口就已經有摩登既感覺，香江花月裝修走八十年代風格，枱櫈擺設都模仿當年既味道，而且每張枱空間好大，放滿全桌邊爐料都卓卓有餘，枱與枱之間都有距離，感覺好舒服。香江花月湯底足足有十二款，好多都好有特色，不過今晚我哋想簡簡單單，點左個秘製花雕豬肚湯，湯底配料相當豐富，鋪滿枝竹，豬肚多到食唔哂，飲落花雕同藥材味好足之餘，仲有胡椒味。打邊爐當然唔少得食牛，叫左一大碟美國安格斯肥牛同牛脷滿足下，肥牛油花漂亮，食落軟糯牛味多，牛脷厚切口感彈牙。之後追加白鱔片，白鱔大大塊，淥熟唔會縮埋一舊，食落無骨有口感。最特別係皮蛋蝦滑，自己DIY將皮滑同蝦滑混合，兩種不同口感既彈牙一齊食，係一種新鮮既體驗。