Café Moa Moa by Panash (已結業)

雖然係荃灣友，荃灣廣場都算熟，但餐廳位置隔涉，位於掘頭行，根本唔會經過，而且完全無指示牌，行咗兩個大運先搵到。可能因為咁，所以假日其他場爆哂佢同無咩客。有落地玻璃超高樓底(其實係同翡翠mirror嘅位)，空間感舒適。P字頭中高價麵包鋪開嘅cafe, 延續其貴氣，tea set $78起，5歲以上最低消費每人一個tea set.炸籃份量可當正餐，兩條春卷仔、兩件炸雞、兩件炸魚、薯條，即炸熱辣辣脆卜卜，炸功唔錯，唔會油淋淋。喜歡春卷同炸魚，炸雞薄身又乾又鞋。配三款醬汁，他他醬突出，多酸瓜粒杰身但唔溜，點薯條都好好味。