胡爐 (已結業)

話說今日又興起想食雞煲，於是就搵到尖沙咀胡爐呢間雞煲火鍋店，提一提，佢哋唔止淨係雞煲，仲有豬手煲同埋鴨煲任君選擇！開頭每位都會先附送一份佛跳牆，炆得十分之味！以上煲物三選一，之後都會包時令海鮮拼盤，胡爐牛拼盤以及招牌手工丸拼盤，食完唔夠喉，佢都仲有30多款食任食打邊爐，絕對係物超所值！海鮮拼盤都好豐富有蟶子、蝦同三種貝類，啱啱拎上枱蝦仲係識郁嘅，可見啲海鮮真係好新解，貝類食落好甜口，蟶子十分之大隻，蝦都好爽口。跟住我哋就開始食佢嘅肥牛拼盤，牛肉入口即化， 牛香十足，牛脷就爽口得多！之後我哋就食丸，呢個手工原丸拼盤三款都係好有驚喜，墨魚丸加入左松露，食落多左陣香氣，牛肉丸裡面係有芝士的，食落爆醬，蟹籽丸都十分彈牙！食埋佢呢個餃子拼盤其實都已經去到有七成飽，餃子皮薄餡靚，細細隻好易熟，食落香氣十足！之後我哋就繼續打邊爐，種類都算多，由於前面都食到飽飽地，我哋淨係簡單點左幾樣總括嚟講，咁嘅價錢性價比實在十分之高，另外每位都會有雪糕送上，加38蚊就可以汽水任飲！同埋佢哋嘅服務都係好好，不斷幫你換碟添水！好值得嚟試下！