蜀客 (已結業)

之前曾經食過呢度嘅食晚飯，印象好好，無論味道定環境都好掂，係食過嘅川菜餐廳之中性價比最高，所以今次約朋友來尖沙嘴呢邊食飯就特意揀左來呢度食。今次我哋坐窗邊望海嘅位置 。雖然對著個窗，但都唔會好熱。呢度嘅店員招呼好好，經常主動斟茶。我地叫左個店員推介、星期一至五先有嘅精選午市酸菜魚套餐，$298兩至三位，性價比好高，我地對所有菜式都十分滿意，同我第一次來食嘅水準一樣！唔洗等好耐就上咗第一道菜，冷盤口水雞， 有別於一般餐廳食嘅，呢碟口水雞除咗有辣油辣椒，仲特別加左花生醬，食起來味道更豐富，並唔係千篇一律嘅麻辣味，每件雞肉都好嫩滑，水準好高！套餐包兩個成都擔擔麵，加入麻醬、肉碎、花生、香蔥拌勻，味道剛剛好，唔會太重口味，麵條都好彈牙爽口！酸菜桂花魚秘制酸菜所熬成嘅湯底，酸中帶點辛辣，裡面除左魚，仲有好多芽菜、酸菜，每塊桂花魚片都無骨好易入口，嚐起來有魚嘅鮮味之餘，口感亦都非常爽滑！香辣桂花魚鮫香脆外皮內裏係滑嫩嘅桂花魚鮫，以乾辣椒炒過後更為惹味。炒白菜係咁多濃味菜式之中點都要有返個清淡嘅炒菜去中和下！紅糖糍粑微煎過嘅粑沾滿糖粉，再點上香甜嘅紅糖糖漿，煙煙韌韌，非常好食，一定要試嘅甜品！