南小館 (已結業)

雖然係星期六嘅晚餐時間，但係等左10分鐘之後就有位。環境舒適，每張枱之間都適當嘅空間!一埋位，枱上面已經準備左茶水同小食(花生同菜脯)。茶水比較特別，係喬麥茶。上菜速度好快，前菜味食完，其他餸已經擺左係枱面。前菜係口水雞，肉質滑嫩，唔會淨係得辣味，仲有其他香料味，好好食！唔食得太辣嘅人都可以試下。主菜係蔥油撈麵同排骨擔擔麵，擔擔麵比撈麵好食。撈麵份量有D小，而且味道普通，得個咸字。擔擔麵比口水雞辣，但同樣香口。麵質方面都幾彈牙，而且D麵無痴埋一舊。排骨炸得鬆脆，粉漿唔太厚，好味！小食方面梗係唔少得小龍包同生煎包!之後驚唔飽，仲叫多樣蔥油餅。小龍包同生煎包都有湯係入面，但係生煎包嘅湯不足，食得吾過癮！小龍包個皮有D厚同硬，要扣分。蔥油餅太多油，食左一塊之後已經有D滯！整體黎講，食物、環境同價錢都唔錯，不過服務質素有待改善，叫左加茶，但係侍應都無咩反應。