龍鳳號 (裝修中)

繼續發掘觀塘美食，今次食咗呢間台式小店，見最近都有唔少人推介，又試吓先。餐牌入面有唔少選擇，有魯肉飯、麵食、小食、甜品同台式飲品。由於想試多幾款野食，專登揀咗一個古早魯肉飯，一個台南擔仔麵、蔥肉卷、珍珠奶茶同黑糖薑汁豆腐花配小丸仔同紅豆。古早魯肉飯（$38）- 份量多，有腩肉同肉碎，味道濃郁，不愧為招牌菜。台南擔仔麵（$38）- 麵好滑身，配埋肉碎食，我鍾意佢清清地，幾好味呀。蔥肉卷（$46）- 另一個必食推介，用豬肉卷住蔥，入口又幾香口，蔥中和咗豬肉嘅油膩感，唔錯。珍珠奶茶（$42）- 佢嘅珍珠奶茶係用燕麥奶整，低糖低脂，啱晒我呢啲對牛奶敏感嘅人。珍珠夠煙韌，微甜。黑糖薑汁豆腐花（$28）- 份量好多，足夠兩個人share 食。配料可自選，小丸子同紅豆分別加$8，另有其他配料，例如珍珠、蘆薈、仙草、椰果及麻糬等選擇。餐廳佈置有傳統特色，座位間距都闊落。食物定價好抵食，食物質素高，鍾意食台灣野嘅朋友可以試吓。