一輝燒味小廚茶餐廳 (已結業)

沙田區如果要搵地道嘅茶餐廳選擇都唔多，馬鞍山嘅一輝好耐以前食過覺得好食，今次就專登揸車過去食。我去嘅時候係做緊晚市，成間鋪坐滿人而我就自己一個搭枱。我一心係想食炒粉麵，所以冇留意到店內有冇私人晚餐嘅選擇。炒粉麵嘅選擇非常多今日我就揀咗黑椒牛柳絲炒烏冬（轉意粉）配凍奶茶。先來凍奶茶，見到個色淡淡地以為奶味好重。點知入口又唔係喎，茶味好濃而奶味都好適中，好味！等咗10幾分鐘炒意粉先嚟，因為係即炒。熱辣辣食得出好有鑊氣，味道好好又好香口，鼓油唔會多到浸死啲意粉，唔會太咸而黑椒味都好香又夠辣。油嘅份量都係剛好，夠炒到啲意粉每條分明但又唔會太多。意粉份量好大碟、牛柳絲份量都好夠，食完成碟飽到上心口。烏冬轉意粉要加$7，凍飲又加$2，最埋單$67。如果就咁乜都唔轉其實只係$58，性價比真係超高！