千賀水產の鮮鍋道場 (已結業)

好耐冇約中學老友聚聚，難得今日我地四個都得閒，當然要出黎食餐好啦。我地四個都係港島返工，老友揀左呢間上網評價唔錯而OPENRICE有優惠嘅千賀水產の鮮鍋道場，我地收工約埋係時代廣場集合，一齊出發。🏃千賀水產の鮮鍋道場位於銅鑼灣智選假日酒店，原來正正就係對住時代廣場，雖然落緊雨，不過咁近我地唔駛開遮都行到過去。餐廳好大間，我地未到7點已經上到去，因為未到繁忙時間，餐廳最入面嘅區域都未需要開，餐廳裝修設計時尚，燈光充足，而且座位寬闊，整體環境好舒適。😙除左無限追加嘅火鍋配料之外，酒店式自助餐區食物種類都唔少，青口、蝦、壽司同其他熟食源源不絕地供應，另外，飲品同甜品款式都比普通放題多。👍千賀水產の鮮鍋道場另一賣點係每人一份的海鮮盛合同刺身，海鮮盛合有蠔、鮑魚、安格斯牛小排等高級食材，海鮮新鮮，當中我特別鍾意蠔，蠔肉飽滿多汁，非常鮮甜。刺身入面我就覺得象拔蚌同三文魚最好食，三文魚每一件都係魚腩部位，分外鮮甜。😋其他無限追加嘅火鍋配料質素都唔錯，最重要係有6小時任飲任食，可以邊飲邊食邊聊天，慢慢嘆，呢餐我地都食得好開心。用埋OPENRICE優惠，埋單只係$260位，性價比好高。👍