紅橋 (已結業)

許多朋友話旺角紅橋性價比高，套餐經常更換款式，保持新鮮感，吸引食客，今晚就約埋細佬去食。有中/西餐湯任選，見紫薯忌廉湯幾特別就揀咗，飲到紫薯味，仲有蘑菇片及粟米粒，有趙口，香滑好飲。接住有巴拿馬火腿什菜沙律，幾清新，爽爽脆脆，胃口大增。黑松露忌廉汁海蝦帶子燴意粉，其中好多嘅黑松露碎舖滿在意粉上，好香噴噴！忌廉汁夠creamy，帶子雖然畧為細粒，但海蝦就夠大隻吸引，鮮味搭夠，意粉份量及軟硬程度適中，有水準！而日式照燒汁鰻魚伴蛋包飯絕對係誠意之作，賣相一流，蛋包飯提高食慾。照燒汁夠多，令鰻魚夠閃亮，入口鬆軟，味美甘香。可以加$18多一款美食，我地揀咗芝麻蝦多士，黑芝麻好香口，配埋厚炸嘅蝦肉，啖啖脆身爽口。經典紅豆冰用四方碗裝住(另加$10)，似甜品多啲，傳統味道，不過，間中有啲紅豆有少許硬身，美中不足，但整體okay嘅！熱朱古力夠香濃，幾好飲下次再試其他菜式，抵食！