逸翠軒點心專門店 (已結業)

放工同朋友過長沙灣買完野後去左呢間逸翠軒食晚飯。餐廳裝修簡潔光猛，坐位寬敞舒適。我地點左168蚊任食點心、雞煲同火鍋。個餐可以任飲，飲品櫃都幾多選擇，除左有汽水、檸檬茶之外，仲有自家製的椰汁西米，味道唔錯。點心 - 潮州粉果外皮唔會太厚，餡料十足。菜苗餃餃皮晶瑩剔透，咬落有韌度。燒賣外皮鮮黃有光澤，包得鬆緊有致，唔會過實，有咬口，肉質彈牙，食落唔油膩。雞煲 - 賣相吸引，份量好足，雞煲的雞肉質唔錯，口感嫩滑，唔會肥膩同鞋口，而且好入味，濃郁香味撲鼻。火鍋 - 有肥牛、豬肉、海蝦、青口、鱔魚片、菜、丸類同青菜等任點，配料選擇多，質素唔錯。特別值得一讚係個鱔魚片，夠曬新鮮彈牙。以168 蚊呢個價錢，有齊點心、雞煲同火鍋，性價比夠曬高。