熱點點心專門店

營業中

休息中

同爸爸飲茶，揀咗間係屋企附近，即叫即蒸嘅茶館。熱點蝦餃皇蝦餃同燒賣都係呢度嘅招牌，而且可以兩粒咁樣叫，就可以試多幾款食物，蝦餃皮好薄，入面有原隻蝦，而且非常彈牙，好鮮甜。蟹籽燒賣皇餡有蝦、蟹籽同埋豬肉，非常新鮮，肉質彈牙。鮮蝦菜苗餃餃皮薄餡靚，有大大隻蝦，菜苗好新鮮，幾值得食。魚翅灌湯餃有一舊魚翅，湯底好鮮甜，灌湯餃皮都係好薄，內餡有豬肉、冬菇等，好豐富。蜜汁叉燒腸叉燒餡好多，好香。腸粉皮唔會太厚，而且好滑。蜆介鯪魚球新鮮炸起，熱辣辣，外脆內軟，而且好彈牙。蒜香蝦春卷炸得好脆口，蒜香唔算好濃，但配搭蝦肉好香口！八寶籠仔蒸飯有8款材料，鳳爪、排骨、芋頭、臘腸、雞粒、肉燥、冬菇粒同粟米，好豐富，尤其加咗臘腸之後。而且係用咗荷葉蒸飯，食落好香，有淡淡荷葉味。