Chang Thai Restaurant & Bar (裝修中)

又係思鄉嘅時候⋯相信泰國都係唔少人嘅鄉下之一，連我都唔例外⋯陽光與海灘，沙灘與美女（我講我呀），唔少得嘅梗係啱晒香港人胃口嘅泰式美食啦！今日就去咗位於銅鑼灣嘅Chang Thai Restaurant，以慰藉下我嘅思鄉情懷～酸辣慢煮魷魚 ($168)酸酸辣辣最開胃，一開波依味餸正正令我食慾大增！調味啱啱好，唔會太酸亦唔會太辣，啱晒唔食得好辣嘅人，加上魷魚係慢煮唔會韌，咬落鬆軟而有鮮味。不過咁好味，記得唔好一次過食晒呀，因為飽咗就食唔到其他好嘢㗎啦！四色小食拼盤 ($118)依個就真係特色中嘅特色！先講食物，泰式小食就梗係有春卷、蝦餅、生蝦刺身、泰式鳳爪啦！除咗嘢食好食之外，佢嘅擺盤真係特別到不得了！佢個嘢可以轉㗎！充滿好奇心嘅我梗係一路轉一路食啦！黃咖喱炒軟殼蟹配法包 ($288)黃咖喱香甜，軟殼蟹外脆內軟，法包仲係用而家時興嘅竹炭包，食完啲蟹，個法包撈埋啲咖喱汁食，簡直可以食到渣都冇剩～招牌泰式青芒魚 ($198)將條炸到鬆脆嘅魚配上清爽嘅青芒絲，青芒絲中和咗炸魚嘅油膩而又不失口感，加埋其他配料同埋鮮青檸，口感清新而又食到魚嘅鮮味，果然係招牌菜！連椰青都IGable