泰醉 (已結業)

經過長沙灣，被呢間泰國菜門口嘅燈牌吸引住，再睇睇餐牌，價錢唔算貴，於是入去試吓。泰式串燒6串分別有雞，牛，豬肉，每串都燒得好香，表面燒得焦焦香香，但食落d肉質仲好juicy,燒得啱啱好，點埋佢地個沙嗲汁，勁惹味。黃咖哩炒蜆都幾大碟，份量都幾多，粒粒蜆肉脹卜卜，食落完全冇沙，佢地嘅黃咖哩都幾出色，味道好香，好正宗嘅泰國風味，我地仲叫埋油酥餅，個油酥餅烘得外面脆脆地，要黎點咖哩汁一流。青檸梳打唔單止有片青檸咁簡單，仲有青檸果汁加埋喺入面，所以飲落勁重青檸味，酸酸甜甜，加埋梳打，好fresh好爽。芒果糯米飯芒果非常甜，而d糯米飯整得啱啱好，煙煙韌韌咁，上面仲鋪滿勁香嘅椰漿，勁好食。店員仲送咗甜品比我地，係椰汁大菜糕，食落好清新嘅椰子香味，爽爽地，入面仲有好多椰子肉，非常足料，唔太甜，好好味。