上海小聚 (已結業)

放假又嚟北角搵食，今次經過馬寶道試吓呢間上海餃子舖，店舖主打手打餃子，上海雲吞，排骨菜飯同各款麵食，選擇非常之多而且性價比高，好多都可以跟套餐，有小食，主食同飲品都係$60左右前菜陳醋雲耳咬落好爽口，微微食到醋嘅酸味仲有點麻辣味，相當開胃。麵食就叫咗冷麵同擔擔麵，擔擔麵除咗花生醬之外仲有點點微辣，而且裏面有豬肉碎同花生碎粒，加埋彈牙嘅麵條，濃郁而且口感十足，擔擔麵仲配上麻辣豬肉，麻辣味十足，啱晒中意辣嘅人估唔到佢連冷麵都有，冷麵有蟹柳絲同青瓜絲，撈埋芝麻醬同小小Wasabi一齊食幾清新。嚟到當然唔少得試佢嘅招牌菜煎餃子，韭菜大蝦鮮肉煎餃子包到大大隻，外型飽滿而且煎得脆身，皮薄餡靚，一咬爆汁，食落韭菜味生香濃，豬肉同蝦肉彈牙，佢套餐包10隻餃子，如果可以雙拼就更加好。套餐仲包薑汁芝麻小湯圓，鍾意佢個薑汁湯底，飲落去唔甜辛辛辣辣咁，配埋甜甜地嘅芝麻湯圓一齊食啱晒。