誠拉麵 (已結業)

今晚特意去黃埔同男朋友仔睇比卡超個聖誕節景～行吉之島行到餓見到有拉麵店就醫肚～呢度地庫原來都有唔少日式餐廳 。見誠拉麵都幾多人食 就決定食呢間！拉麵有三款～分別有白豬骨湯湯底 黑蒜豬骨同赤(辣)豬骨湯底，仲有一款沾麵。有普通同特別款選擇 亦都可以轉餐～我同男朋友分別叫左黑同赤湯底特款轉餐。本身想食沾麵 但太好賣已經賣哂了qwq我食既係黑蒜湯底加左份煎餃子～特別款係多半個流心溫泉蛋，跟麵三塊日式叉燒 ，比起外面都算係厚切有咬口，肥瘦相當均勻～～黑蒜油好香亦都好夠油份～有濃厚嘅豬骨味！而且濃得來唔係死鹹。好味到我成碗差唔多飲哂！餃子煎得剛剛好 ，即叫即食既關係，咬落係個底係脆卜卜。入面好有肉汁～而男友既赤豬骨湯唔會話好辣，但想唔到咁惹味 ，飲完又想再飲！佢個餐就跟左個小叉燒飯，個飯底用左日本米，上面仲有加蔥同芝麻吊返香味。價錢唔貴，性價比高！