尚鮮海鮮料理 (已結業)

太耐無見朋友，所以約咗黎銅鑼灣打邊爐。我地叫咗個星級之選套餐，貪佢乜都有，夠哂豐富又唔洗自己諗！一開頭嚟咗個頭盤，係清酒飽魚同泰式生蝦。個鮑魚切粒，食落好新鮮。而生蝦雖然冇泰國舖咁好食，但食完都幾開胃。我哋叫咗兩個湯，姬松茸冬瓜同埋血池麻辣湯，個冬瓜湯都幾足料，開頭飲咗幾淡覺得幾甜。而個麻辣湯唔會太辣，少少麻啱啱好。海鮮有海蝦，聖子，鱔片同大蜆，全部都好新鮮，建議落落去清湯，咁有食到浸鮮味！我地對個安格斯肥牛非常期待！試咗一舊返唔到轉頭，入口即溶感覺，如果唔係仲有好多野食一定會encore...丸方面有豬肉丸同墨魚丸，不過不失，如果有埋其他丸就更好，特別係芝士丸。雖然冇其他丸，但都有芝心獅子狗同芝士腸，可以補返數！我地幾鍾意木耳仙蝦雲吞，一咬落去口感豐富，我覺得比丸好食。另外仲有豬肝，血，皮，浸落麻辣湯一流！好似食緊川菜咁。最後就食咗稻庭烏冬，加埋啲雜菜食，清清地，唔會太過飽，份量啱啱好！